പുതുവത്സരത്തിന് കൊച്ചുകൂട്ടുകാര്‍ക്കായി
എന്‍റെ വക ഒരു കൊച്ചു സന്ദേശ ഗാനം
അനില്‍ പനച്ചൂരാന്‍റെ
'ചോരവീണ മണ്ണില്‍ നിന്നുയര്‍ന്നു വന്ന' എന്ന
ഗാനത്തിന്‍റെ  മട്ടിലൊന്നു പാടിനോക്കണേ

                               സൌരഭ്യം

മക്കളേ നിങ്ങളെത്ര ശക്തരെന്നറിയണം
ബുദ്ധിയുണ്ടു ചിന്തയുണ്ടു തത്വമങ്ങു നോക്കണം
ദേശമേതുമായിടാം ഭാഷയും മറന്നിടാം
ദ്വേഷമേതുമില്ല സ്വന്ത വീക്ഷണം നിറക്കണം...
ജീവിതം മോഹനം... പാവനം ഭാരതം

ബന്ധമൊന്നുമോര്‍ത്തിടാതെ ബന്ധനത്തിലായിടും
സ്വന്തമെന്നറിഞ്ഞതൊക്കെ അന്ത്യമങ്ങു നീങ്ങിടും
നേര്‍ക്കു നേരെ കോര്‍ത്തിടും ചേര്‍ച്ചയില്ല സഹജരേ
ഓര്‍ക്കണം മഹത്തരം നേര്‍മ്മയുള്ള ഹൃത്തടം
ജീവിതം മോഹനം... പാവനം ഭാരതം

അക്ഷരം പഠിക്കണം ഭക്ഷണം കഴിക്കണം
പക്ഷഭേദമേതുമേ തല്‍ക്ഷണം മറക്കണം
തട്ടിടും തികട്ടുവോളം കിട്ടിടുന്നതെന്തുമേ
തിട്ടമില്ല ഭുക്കുകള്‍ക്കു ചിട്ടവട്ട ചട്ടവും
ജീവിതം മോഹനം... പാവനം ഭാരതം

ദേഷ്യമങ്ങു മാറ്റണം ഭീഷണി ത്യജിക്കണം
ആശയൊത്തൊരുങ്ങണം ആശയം പുലമ്പണം
കീശയല്ല ജീവിതം നാശമല്ലയന്തിമം
വീഴ്ച്ചെ നിന്നുയിര്‍ക്കണം കാഴ്ച്ചയില്‍ പഠിക്കണം
ജീവിതം മോഹനം... പാവനം ഭാരതം

മോഹമങ്ങൊതുക്കണം മൂകത പിരിക്കണം
ദേഹമൊന്നിളക്കണം രോഗവും പറക്കണം
നഷ്ട ചിന്ത കഷ്ടമേ നഷ്ടമങ്ങു ശിഷ്ടവും
ഇഷ്ടമുണ്ടു സ്പഷ്ടവും ഇഷ്ടമങ്ങു ശിഷ്ടവും
ജീവിതം മോഹനം... പാവനം ഭാരതം

കാഴ്ചയങ്ങു മങ്ങിടും കാലവും കടന്നിടും
നിശ്ചയം നിന്നിടും നിശ്ചലം കിടന്നിടും
മിച്ചമാം മക്കളില്‍ മാനവം നിറക്കണം
നിശ്ചയത്തിന്‍ ധാര്‍ഢ്യമാം കേമരാക്കി മാറ്റണം
ജീവിതം മോഹനം... പാവനം ഭാരതം

ജാതിയൊന്നെയുള്ളു ഭൂവില്‍ ജാതരായ മര്‍ത്ത്യരേ
സ്നേഹമാണു ഭാഷയും ശ്വാസമാണു ജീവനും
വാഴണം നമുക്കു നല്‍വരായി ശ്രേഷ്ഠരാവണം
ഏഴകള്‍ക്കു ശക്തിയായ് നില്‍ക്കണം നിരന്തരം
ജീവിതം മോഹനം... പാവനം ഭാരതം.